-C. Lalhmangaihzuala (Mastea)

I choka bêl bâwm leh chhuar velah te fanghmir leh chukchu a tam ṭhin em? Fanghmir leh chukchu tam vangin nuho tam tak an mangang ṭhin a, engtia han tih-rêm chi nge kan hre si lo. Hei vang hian mi tam tak an buai phah ṭhin. Tunah erawh he thu chhiartute’n chu buaina chu kan pumpelh thei tawh dawn a ni.

I chhuar leh bêl bâwm vela fanghmir leh chukchu awm ṭhinte chu awlsam tëin a hnuaia kan sawi ang hian i tirêm thei ang:

1. Chhuar/bêl bâwm bangah khan thuziak lian tak i tár ang. Tun laiin banner lian leh mawi tak tak, flex printer hmanga an siamte kan hmu ṭhin a, hetiang hi nang chuan ṭangkaiah i lo hmang dawn a ni. Banner lian takah chuan thuziak hetiang hian i siam ang — “He bâwm/chhuar chungah hian fanghmir/chukchu tân luh leh chhuah leh khawsak khap tlat a ni. A ti lui man in awm a nih chuan, dân angin in chungah action na taka lâk a ni ang..” tiin.

He thuziak hi i chhuar leh bêl bâwmah i tár ang a, chu chuan rannung a titîm ang a, fanghmir/chukchu te hi rannung rilru dawih tak an nih avangin tumah an rawn lût lui ngam dawn lo a ni. Tichuan, chu’ngho avanga i buaina chu awlsam takin i pumpelh thei ta.

2. I chhuar leh bêl bâwm bang leh chhuat vel zawng zawng kha limbu tui emaw, hatkora tui emawin chulh chhuak vek rawh. Fanghmir limbu bàwm emaw chukchu hatkora bàwm emaw hmu kan awm tawh em? Kan awm kher lovang, i chhuar leh a vel zawng zawng hetianga i tih chuan rannung an kal duh dawn lo a ni. A nghal zual lo kal lui an awm a nih paw’n an ha a ṭim nasa em em dawn a ni tih hriat reng tur a ni. Fanghmir ha ṭim chuan engmah an ti peih dawn lo va, an bawk hle hle mai dawn a. Chuti a nih chuan, i buainate chu awlsam takin i pumpelh leh thei dawn a ni.

3. I chhuar leh a velah milem hmelchhe tak tak târ ṭeuh rawh. Fanghmir leh chukchu hi rannung rilru dawih tak an ni kan tih tawh kha. Kha’ng milem hmelchhe tak tak i târ ṭeuhte kha an hmuh hunah an rãp ang a, i chhuar leh bêl bâwm vel chu ṭih sakhaiah an neih ang a, vawi te khat pawh an rawn kal leh tawh ngai lovang.

Khai le, i buainate chu i pumpelh ta e!

He thu ziaktu, Maste-a hi Comedian Search 2011-a pakhatna kha a ni e. (He post hi vawi 347 keu hawn a ni tawh e.)

-R Lalchanchin Mawia

Tlêm lai deuha thingtlângpa titi ka vawrhtir kha ṭhianpa Taitea (Lalnunchanga) te, Zarmawia (Bihchianga) te, Lalrammawia (te tak tê ngen ṭhin)te khân an lo hlut der viau mai a. Kan Ngentepa phei hi chuan, ‘A bu tûrin rawn inbuatsaih hial teh. Ṭhangtharte hian an la hlut chho deuh deuh dâwn tlat’ a ti hial nghe nghe a. Sawhbâwl ngaina ta ngang chuan sehhmeh dang tel miah lo pawhin ka lem ta duak duak mai a. Kâ-lûamate vâng pheng hian duhtâwk ngah tawh hnuah ka’n bung ṭha leh teh poh aniang chu.

Tuk khat chu tlangval phanchang tawh tak Hrânguma leh Upa Chiarhmu-a hi pûmah thir dêng pahin an titi a.

Upa Chiarhmu-a: Ngawi teh Umpui, nimin Suizingi nêna ram lama in inzui liam kha ka lo hmu reng che a. Nang ang vâl phanchang, hrisêl tak leh chepa nung khai ang vat vata nung bawk si chuan, a lothlawn ngawt chuan hun i khawhral ngawt lo tûrah ka ngai a. I tlawm ngei ang chu maw tiin ngaih ka lo ti tha ve ngawt mai a. Vawi engzat chiah nge maw i’n hnawm le?

Hrânguma: Khai a..pa Chiara chu, i ti ang lo thin mang e. Ka tuinu ûm tûr leh a Leipui kal tûr kan chhuak rual satliah lekfang a nia. Thui pawh kaldûn lovin tuifar bulah khân ka pên san daih alawm. I kamhlei hian thil a ti khawlo zo ang e. Hêng ang thil hi lêichhe châwi theihna a ni lehnghâl a. A pasalin a lo hre rêu rêu ang a, kan nasa lo dûn viau mai tûr a nia.

Upa Chiarhmua: Mai mai a, engti pawh chuan lo khawsakpui la, hlauhthâwn vak tûr a awm lêm em ni. Pachang sûlhnu leh Lawng sûlhnute chu hriat hran tak tak theih tawh nghal loh chuan. Dim baksak lovin enge ni vei tiin han phûngtlâk sawh hlawih hlawih mai la tha tûr a nia. Khu pui, a ruakhauin dawlh a kai tha zet zawt si a. A vunte lah khu rûlhût silfai ang maiin a ngo piak reuh lehnghal bawk nên. Tu khawkha chimbuai lohin rampalailêngah han keuh ruah mai ila chu, Sepui a keuhthlûk ruah tuma Keipui lunglâwmna chu kan pha ve thuak mai âwm asin.

Hrânguma: Pa Chiara hi kohhran upa ve si, a rawngkai lama mi han bâwlzan vêl hi i nuam tih zawng a ni tak si a le. I beramte thlarau nun chu a ngaihtuahawm âwm mang e.

Upa Chiarhmua: Kan Umpuia mai mai thin hi a, nangmah ang bawka Bui thi khài ang hnuang pu ta bik lo na nâ nâ chu, Upa mah ni ila, hnuailam hian thanharh hun a nei ve ang tih te chu hre âwm rual i ni tawh maw le. Enge ni vei, kan thiangzauho pawn ‘mihringte chu leia siam kan ni a. Leitlang leh leitlang innâwk mai maite chuan thlarau nun a khawih pha lo ve an tih kha. Kohhran lamah phuartu nihna engmah i nei lo bawk a, i lo pûkchhe hul rei tawh bawk nên; pawisak neih vak i hun tawh lo. Chutilo chu, i hrisêl fû roh bawk si a, i khai far tluah tluah loh vêk pawn i chi a hût hman ang a. Thinglubûl ang maiin thlah nei lovin i khâwk hlauh mai tûr asin. (Hrâng-uma chu a tunu-in a rawn au a. A va chhâwn tûr han insingsa vêl chuan an thir tuaina tuichhe kuang chu a pal let a, a baw ta vek mai a. A tunu chu va chhâwnin pûmah a lo lut leh a.

Hrânguma: Khai aw Pa Chiar, ka hmanhmawh aleiah, ka lo en lêm lova, kha, kan tuichhe kuang ka pal palha a buak zawh tâk vek kha.

Upa Chiara: A baw ve bawk ang chu le. Tuite mai mai zawng a tam ê mai. Luipuiah phei chuan a luanin a luang huau huau reng alawm. Kan mizo upate pawhin ‘Tui dehnaah tui a bua a, buh dehnaah buh, hmeichhe thil (?) dehnaah baw a bua e an tih kha. I tunu chuan, eng thilah nge maw chutia a rawn auh ruai mai che le?

Hrânguma: A, englo a nia, nimina ka sangha hawn tlêmtê kha buh nên kan tuitam a, a hmin tawh angem tih min rawn zawt phungchâng mai mai alawm maw le.

Upa Chiarhmua: Chu, a so tawh em?

Hrânguma: A sona chu a rei tawh âwm e. Tunlai chu thingkhuailu kan tuah lai a nia, tui chhuan a so zung zung mai a, kan samkhai phah khawp mai.

Upa Chiarhmua: Chutia a so tawh chuan suan hmanhmawh rawh se. Chutilo chu, an chhûm sawm vek mai ang. Tuivâwta chêng thang tih takah, lum nên hi chuan an in âihal khawp a, luisa rêng rêngin lum ai an mamawh rei ngai lo. An hmin zung zung mai a. Nuthlâwi tuah tawh tak ang deuh hi a nia, rei sâwngbawl a ngâi ngai lo. Han so sek sela a ei theih nghal mai zêl a nia.

Hrânguma: Pa Chiara tak hi chu âw..! titi pangngai i’n vawrh ve tawh dâwn emaw tih pawh hian, reiloteah a rawngkâi lamah bawk i kâilût leh thin a. A inthlahrunawm rualin a ngaihnawm bawk si a!?

Upa Chiarhmua: Ka duh vâng rênga sawi pawh ka ni chiah bik lo. I tuah tawh lutuk hian min cho chhuak a ni pakhat bawk a. Vala pumpa ve lêm, hetia i khâi tlaw zuar reng mai leh zun nân bâka chhawrbâwkna rêng rêng i nei lo mai hian min ti tlâwmla deuh bawk atin ni. Ngawiteh, kan Zathohliani khu kan zu hèl dun mai dawn em ni ang? A hun ve tawh sia a deh a samkhâi zaw phian lawng maw.

Hrânguma: A khai, a ni zawng ni lul lo ve, a hmêl zikzek khuan mi a lêm hlawl lo.

Upa Chiarhmua: Mai maia Umpui, hmêlchhiat leh that thliar a ngailo. Midang neih ang tho alawm a neih. Sa kawchhûng theuh theuh a lêm chuang hlei nâng. Heti hrim chuan fa lu hloh thakin i lêng dâwn tlat. I ṭin tawh teh ang, zânah min rawn sâwm la, kan zu ngaihven dún dâwn nia. (He post hi vawi 108 keu hawn a ni tawh e.)

-R Lalchanchin Mawia

Khawi’nge tun ṭum chu, thlahrang tenghnengtê tê ka’n lawrkhawm ang a. Hlauhawm lam aia nuihpui tlâwrh tlãwrh thama a rah phei chuan ka hlawhtling thawkhatah ka ngai zawk ang.

U SAWIATE EKIN HRANG..
U Sawiate ekin hi, ekin han tih lêmah a hming chauh tak taka buara zarhliap mai a ni a. Êk remchâng tura thingtuai pali panga vel khawdai kawra kham kai, a hmalam leh sirtawna saiip puan zaithlera zar a ni a. A hnunglam erawhchu, ramhnuai vek anih avangin mau leh thingte chuan hmuh theihna mit tak tak nei hek lo, engmah zâr lovin a âwng huau a. Ka e ve lonãin a thawvengin êk a nawm hmel em em mai a. A hming min phuahtir se chu, ekin thawveng ka ti ngei ang.

Zankhat chu u Sawia inthiar chu, san a pêk lai takin hmawlhtêin a mawngah an rawn hawlh dai dai mai a. Torcha a’n ên vêl ngial pawhin engmah a hmu si lo, mak a tiin a hlau deuh bawk nên; êk pawh e kham thathum hman lovin a haw ta ringawt mai a. A tuk zâna a nu inthiar pawh chu, san a pek laklawh lai tak bawkin hmawlhte chuan a mawngah an rawn hawlh ve leh ta dai dai mai a. Ani nutling chuan hlauh tinah tin lovin miin an fiamah a ngai a. ‘Ka hlau chuang lo che a nia’ ti chungin torch in a’n ên kual a. Mahse, tumah a hmu bawk si lo. Thlanglam atanga rawn hawlh turin kawr ko a thûk bâkah a chhengchhe si a. Thâwm nei lo chuan tuman an hawlh theih hmel bawk si lo va. Ani pawh chu, hlauhnain a thâuah rawn manin e kham thathum hman lo bawkin a haw ve leh ta a. Heta tang hi chuan an chhungkaw zingah, u Tpi tih loh chu, zan lama e ngam an awm ta meuh lo va. A theih hram chuan zan lama ek chu an pumpelh hrâm thin.

Zankhat erawh chu, u sawia chu a kua-in a zût avangin loh theih loha êk a ngai ta tlat mai a. Hlau rilru tak chung chuan, a tulnain ur thlu miau hek le. E tur chuan a kal ta nge nge a. Mawnga hmawlhte tun ang maia a ek khawh pur pur lai chuan, a mawngah chuan hmawlhtein an rawn hawlh leh ta dai dai mai a. Lo hlauh rilru sa nâka laia chutia rawn hawlh leh ta chu hlaua tê tuarh tuarh chungin a biling a balangin a tlanchhe haw ta a.

Chutia, awrawl tawpa a sarâk tâk chiamah chuan a êk chânga hnuailama tan lo khawh vawk rualho chuan an lo hlau hle a niang, ngêk ruai ruai chungin an tlanchhe ta hum hum mai a. Hemi zan hi chuan he thlahrang pawh hian a ti lutuk deuh ta niin a lang.. Chutia vawk rual ngêk ruai ruai chunga tlanchhe hum hum thâwmah chuan, ekin bul thinga lawn, thlahrang phu nasa lutuk chu a ke rah a tleu a. A hnuai hnim zingah chuan a tla thum ta dawm mai a. U sawi râk thâwm hriaa fiah tura kal tlangval ho chuan, thei leh thei lova, hnim kar atanga U Dothanga rawn inhai chhuak kût kût chu an zu hmu a. A tlakna zawn tak kha khang hling zam teuhna a lo ni kher bawk si a. A vunte chu pilh hrupin a kawrte pawh a thler hniang hnuang mai a ni. Hemi zan atang hian U Sawiate êkin hi a hrang ngai ta lo.

A hnua u Dothanga sawi danin a fa (sawn) neihna nu, U Sawia farnu u Tpi nen intiamin ekin bula inhmuh an rêl a. Mahse, zanlama êk an chin êm avângin chance an hmu hleithei si lova. Chuvang chuan chutianga thlahrang anga che ta mai chu a ni âwm e. An ekin hnung tlema sir hretah hian thingse kung lian deuh mai a dinga. A kakpui leh an êkin chu a inzawl chiah a. Chutah chuan lawnin a kakpui thlãra biru chungin hmawlh sei deuh a inchhawp a, a lo hawlh thin a ni âwm e.

PU KAWLA TE IN HRANG..
Pu Kawla hian fa chu a nei duah nain nupui pasal neiin an in dang tawh hlawm a. An nupa leh an fapa naupang ber tleirawl ve dawn êk êk tawh nên an khawsa a. Hetih hun lai hi chuan cement chhuat chu sawi loh, thingphel chhuat pawh a la vângin dâp chhuat deuh vek a la ni a. Chaw ei dawhkân pawh la hmang lovin chhuatah chaw an ei mai thin.

Tlaikhat chu, an feh an haw tlai deuh nge ni? thimhmul, unau hmel hâiah chaw an ei a. An chaw ei lai chuan an chawhmeh suahna khuhhriang chu a mahin a chesawn ta hrut hrut mai a. eng emaw chen a tawlh hnu chuan a baw ta vek mai a. Mak an ti khawp mai a. Inhnuai atangin miin an rawn hawlh a ni lo maw tiin an zu en a. Mahse tumah an lo awm bawk si lo. A ngaihna an hre lovin ramhuai thiltihah an ngaia an hlau hle a ni awm e.

Hemi aṭanga ni thum tûkah, Pu Biakkhuma, mi pangngai pha zân lo hi a lo leng a. Ka pa hnenah chuan, Pa Lût, Kâwlate in hrâng kha keimah ka ni a. In hnuai atangin hmawlhin ka han hawlh dai dai a. An chawhmeh suahna belthleng chu ka hawlh kal ta a. ‘A..a mak lutuk, kan belthleng hi a mahin a che ringawt mai an ti a, an hlau khawp mai a. Ka phûr ta lutuk chuan duh aiin ka lo hawlh na ta lutuk a niang chu, an belthleng chu a lingkhup thawk mai a. Awng atanga rawn buain min rawn buak a. Tichuan min hmuh hmain ka tlanchhe ta a. Zatâwna in hnuaiah tlân lûtin ka kawr chu ka’n hlip a. Anni buhbai an lo hmeh niin, ka kawra buhmal kai chu ka thiar mawlh mawlh mai maw le’ a ti a. Ka lo awm vein a thusawi chu ka hre ve vek a, ka nui nasa teh asin. Amah hriain a sawi lai hmël chu hmu ve ngat la chuan tai na ûrhin in nui ve ngei ang. Tunah pawh hian ka ngaihtuah apiangin mahniin ka la dîr tlak tlak thei zu nia (He post hi vawi 198 keu hawn a ni tawh e.)

-R Lalchanchin Mawia

PU RAMMUANATE IN HRANG..
…..Pu Rammuana hian fa pahnih, kan rualpui Sâwma leh a nau Nunhlu-i a nei a. Sawma hi, a kâng al tâwn tih takah mâwk ve tak, hauhûk rãi dul ang maia thim mûk mai leh meng tle râ mai a ni a. A nawh ngun êm vang pawh ni lo, a vun rawngin a zir êm avãng zâwka ha lang vãr thût mai. Golgate fakna atãna itawm tak mai a ni a. A nau vun erawh thungchu a pângngai khawp thung a.

Heng hun lai hi chuan, In lama inawmtleina tür tunlai changkânna bungrua hi kan la hmu pha ve lêm lo bawk a. Naupangte hi a hmei a pãin kan pawnto nasa hle thin a. Sâwmate unau pawh rual an pâwlin zâkhua an rawih bawk a. Zan lamah na nã nâ chuan tuallaiah an tam dûn ve hle thin a ni.

Zankhat chu, Sâwma nu leh pa chu khawhar inah an kal a. Heng hun lai hi chuan kawlphetha êng a la awm lo va. Zan dang ang bawkin keini naupangho pawh pawntovin khawlaiah kan ri chêlchûl a. Sâwma nau Nunhlu-ite pawh chu, a thiante nen, ‘Ngûr kan lal lâi, sailo ngûrpui kan lal lâi. Kan thlelel lel kan thlunglû, kan vai riai riai kan châwnbân. Kan per chhek chhek kan pheikhawng, khawng lehzual’, tiin an thle dial dial a. An phâk tâwk leh theih tâwkah nun âm taka chênin an hlim ve takzet a ni.

Chutia eng emaw chen hlim taka an tualchâi hnu chuan, zânte a lo rei tan ta bawk a. La kham lo hle mahse, zing thawh hai palh a hlauhawm avangin tin zai an rêl ta a. Inkutsuih kual pûta thle dial dialin ‘Tîn dialah tin dialah, naktukah khua var sela, inkâwm leh dial dial ang u, mahni inlam hawi theuhah’ tia mahni in lam hawiin an tin ta hlawm a.

Nunhlu-i haw ta chu, a nu leh pa an lo la haw lo va. An in a thlen chuan, han luh mai a tum a. Mahse, inchhûngah chuan thâwm a awm ta tlat mai a. Kawngkhar chu pawnlamah a inhawlhkalh tlat bawk si a.

Kawngkhar hawn tuma a vuan chiah tihah chuan thil tla ri rum rum thâwm a rawn awm leh a. Chu thâwm chu mihring thaw ri hruih hruih riin a zui leh nghal zat bawk a. Nunhlu-i chu lût mai ngam lovin pâwnah chuan a ding rih a.
Hlau chung chunga eng emaw chen a ngaihchân leh hnu chuan, mihring chau awm êm êm maia rûm thâwm a lo chhuak leh a. Chutah meuh chuan lût lui ngam lovin, an aia rual u deuh si, pawntonaa an kawm ve phak tho Tki leh sangzuali a pun ta ringawt mai a. Anni chuan kawngka hawngin in chhunglam chu an han biha engmah an hmu bawk silo va. Chutia engmah an hmuh bawk si loh avâng chuan hlauhnain an thâuah a man a. ‘Âi ka hlau’ tih leh tlanchhiat an rual nghal a. An thian hmeichhe naupang dangte nên inpunkhâwmin Nunhlu-ite in bulah chuan an bial khawm ta tuau tuau mai a.

Chutihlai hun chu, hmeichhe hmuha inlâkpâ nachâng hre tawk chiaha mahni tawka intih thêngthâwng lai a ni a. A hlauhawm leh hlauhawm loh lam ngaihtuah hman a ni lo, hmeichhe naupang hlau thlabâr thlamuan tur leh an hmuha in lâkpa nâna han finfiah chu chhungril lamin tûl tiin min tur ut ut mai a. Tichuan, finfiaha luhchhuah tûrin Sâwmatein lam chu ka pan ta a. Hmeichhe naupangho chuan min zui tak dûl dûl a. Mahni rau rauah ka to ber lai a ni hial âwm e.

Tichuan, ka huaisenna zawng zawng leh a bâk zawng pawh sâwmkhâwmin, intipâ tâwkin kawngka chu ka’n hawng ta ngei mai a le. Ka lût tûr meuh erawh zawng phat rual lohin ka hlau ve deuh nge ni? Ka tim ve sawk mai a. Mahse, hmeichhe naupang zingah chuan, rual û tena ngaihzawng min thlan tir nikhua a, thlasik anga khêl lova ka thlan ngei ngei thin tê kha a awm ve tlat mai si a. Eng anga hlauhawm pawh ni sela lût lo thei ka ni tlat lo.

Tichuan le, hlau lo anga lan tum tak chunga lutin bati chu ka va chhi kâi ta a. Bati ênga kan hawi kual chuan, kawngka lu chung bang chhunglama Sawma bet tai mai chu ka han hmu ta a. A ni tukverh lamah a lo lâwn lût chu niin.. chutia amah a ni tih kan hriat tak siah chuan a lo chhuka a nui ta ruh ruh mai a. Hmeichhe naupang ho lah chu Sâwma a ni tih an hriat tâkah chuan an hlauhna zawng zawng a bo nghal duak a. An hlauhna a bo rual rualin an mi mamawhna pawh a bo ve nghal a. Ngaihsânna mitmeng nên min melhin min bawr tuau tuau ang chu tih rilruk nâk alaiin.. chuti ta lo chuan kei min hrechang lo lêkin sawma chu an bawr tuau tuau mai a. ‘I â em mai, i nau i tithlabâr lutuk alawm’ tiin an hau rawn luih luih mai a. Kei erawh chu, intipa tâwkin kil khatah ka lo thu tûm buau mai a ni. (He post hi vawi 296 keu hawn a ni tawh e.)

Lalpa, vawiin ni-a kan then tâk kan unau hi mihring dânah chuan inâwkhlum a ni a; nimahsela, kan sakhaw puithiam leh rawngbawltu, Pastor-te thlengin ‘Pathian nung leh engkimtithei kan nei alawm’ tih aiin doctor leh hospital lam ringawtah kan innghat thin a nih laiin ani hi chu chhungkhat laina leh thenawm khawveng thlengin hrisel lohna, insawiselna, bawrhsawmna a awm an sawi hauh lo. Chuti chung chuan a chatuan hmun thlen châka amah leh amah mahni kut ngeia a lo inthlah zalen ta hi mihringte’n kan ngaihdan aia ropuia i lo lawmluh keima mimal hi chuan ka ring a ni. Amen. (He post hi vawi 307 keu hawn a ni tawh e.)

Awle, hei mihringte’n kan inrinlâwk lohva thil kan tawn ngei ngai chu thihna hi a ni a. Ka fapa Faka hi amah hretute chuan a duhzawng chu in hre phawtin ka ring a; zu hi a in ve Thin a ni mai lo va, a tlan hian a tlàn karh karh a ni ber a. ‘Zu in suh’ kan tih lahin sim chhin a tum eih lo va.

Eng emaw chen a in hnuah chuan tu nu thu pheng nge ni a awih a, a sim ta deuh mai a. ‘I va ti lawmawm em!’ han tih teh fo lah chu a inluling lawi ang tih hlauvin kan ngawi ve mai a. Kum hnih thum a’n nghei hnu phei chuan a taksain a ngeih a, a tha ve kang mai a.

Lâwma beng kan lo tihpharh hak hak lai chuan kan in bulah hian mihlim tawngtawl lam, nei liam deuh, Thlarau Thianghlim pawhin a tlawh zen zen tawh loh tih hriat tak mai hian in a rawn luah hlauh mai pek a. Zing leh tlai tin mai hi a pakai a, a nam ther ther nilêng ta reng mai a.

Chutiang chuan kum thum chhûng teh meuh chu an inhrawn ta a; a hrai hlum e, zawng ka ti phal hauh law, amah Faka hian a tlin ta ngang lo a ni ber mai zawk a. Mi damchhuah duha cheng sâng tam tak sênga hospital-a an awm hnu pawha damchhuak zo ta lo te — a runthlâk e tir’u?

Kan fapa Faka erawh hi chu a duhber thihpui a ni a, midang ai chuan nuam ti zui turah ka ruat ngawt mai a. Pawl sawm a pass atang khan ‘hei hi ka thawhchhuah ve’ ti-a thehluh mumal nei lovin vawiin hi kan thleng ta zawng a nih hi! (He post hi vawi 486 keu hawn a ni tawh e.)

-Israel VL Ralte

CHAWNGKHUM DÂN TLANG HUAT LOH

*KHENGLAWT: Fiamthu an thiam em em a, fiam erawh an dawl lo.
*ZADENG: Hmangaihna an ngah a, an huat nih erawh a hrehawm.
*CHENKUAL: Thian siam an thiam em em a, chhass-ah erawh rinawmna an tlachham.
*HAUHULH: Duhawmnain a bawm a, duhawm nih dan an thiam lo.
*HNIALUM: An hawiher a zau a, an fing lutuk lo.
*LAILUNG: An luhlul a, tih thiam chuan duhna naah an tirh theih.
*HLAWNCHEU: Mizia hriat har tak, hriat tawh hnu chuan hriat awl tak an ni.
*BAWIKHAR: Thinlung sak ve tak, mi chhiatna tur erawh thliar thiam tak.
*THLAUHTHANG: Fiamthu ngaithei lo tak,rilru tluang tak
*TLAU: Rilru tha tak, tluang tak mah se tih ngai.

*RALTE: An hmeltha lo va, an rilru a tha.
*KHAWLHRING: Fiamthu an duh a, fiam pawh an dawl.
*SAILO: An zau tlangpui a, mi hriathiamna an ngah.
*FANAI: An thinchhia a, an rilru chhungril erawh a tha.
*CHHAKCHHUAK: An hmeltha tlangpui a, a chhe tawh ho chu hmuh tlak vak an awm lo.
*BUNGHAI: An tawngthei a, hnial mai mai chi an ni lo.
*JINHLAWNG: an rilru a tha tlangpui.
*AINEH: Mize pangngai ve tlak, chhungril belhchian tur awm lem lo.
*AZO: Tawng duh tak, a hun leh hmun erawh thliar thiam lo.

*BAWLTE: Luhlul an tih piah lama luhlul.
*CHAWNGTHU: Hlimhlawp ngaina tak, mahni inveng thiam tak si.
*CHAWHTE: Hriatthiamna ngah tak, rilru tluangtlam ve satliah.
*CHHANGTE: Hmangaihnaa luangliam em em, luck vak chuang lo.
*CHINZAH: Fai ngaina tak, chawhmeh ui lam tui ti tak.
*HAUHNAR: Lemchan thiam tak, kawng engkima lemchan ching.
*HLAWNCHHING: Hringnun ning em em, dam thlakhlelhna nei lova inhria, mahse hlimna ngawt zawng si.
*HMAR: Hmeltha leh duhawm tamna, mahse hmangaihna sem zai thiam tak.
*HNAMTE: Hmangaihnaa luangliam, hmangaihtu tak tak tawng si lo.
*HUALNGO: Zai ngaina tak, eizawnna tlak khawpa zaithiam lem lo.

*JAHAU: Pianpui finna ngah tak, zahpui tham khawpa tawngthei.
*JONGTE: Midang care thiam tak, mahse chintawk hre lova care thin.
*KHIANGTE: Mut duh ve tak, sa hlawhchhuak si lo.
*BAWITLUNG: Zaidam leh nunnem, mite harsatna hrethiam pha chuang si lo.
*NGENTE: Rilru tluang leh fiamthu duh tak.
*HAUZEL: Fak der nuam tia tak tak emaw ti thin.
*HRANGCHAL: Nuih duh tak, hun leh hmun thliar thiam hran lo.
*KINGBAWL: Thluak tha tak, hman tangkaina tur hre chuang lo.
*LIANHNA: Chawhmeh duh tui tak, chawhmeh awm lo pawh ei teuh thei tho.
*MUALCHIN: Hmangchang leh remhre tak, a tul huna hman tangkai nachang hre lo.

*PACHUAU: Hmeichhiate an hmeltha tlangpui, mipa erawh sawi vak tur awm lo.
*PAUTU: Hlimhlawp ngaina tak, lungngai reng hmel pu si.
*PUNTE: Tawng tlem tak, zah hre miah lo.
*ROKHUM: Phakarna leh depdena rilru pua mite hlawkna tur hriatthiampui mi.
*THANGLUAH: Zaidam leh nunnem, mi pawisawi chiNg tak.
*THIHLUM: Midang ngaichang thiam tak chunga mahni hmasial em em.
*VANCHHAWNG: Mahni nihna hre em em, mite chunga inla thei em em.
*VARTE: Hmangaihna ngah em em, huatthu chhe tak.
*VANKEU: Lunglian leh luhlul tak, aia upa thu ngaichang thiam em em.
*VANTAWL: Hriatthiamna nei tam, midang harsatna thlen ching. (He post hi vawi 724 keu hawn a ni tawh e.)

-R Lalchanchin Mawia

Naupan laia kan pawnto thin lai chuan, hlâwm hniha inthenin, inkâr hlat takin a hrangin kan awm khawm a. Lehlama awm te’n rawn auin ‘Ar-a mâwn ding mâwnah. A thaia kan pêka kan hlânah. Nu Nghaki thlân nu Nghâki thlân (tu emaw hming lamin) kan lâkah’ an ti a. A hming an lam kha tlân titihin ava phei a. A thlen dâwn têpah a kalsan lamte khân, a hming sawiin ‘..a ber kher inlâk leh a pawi lêmlo, i hi hî hî tawlhthlûkah tiin an rawn au zui a. Chuveleh chuan an tawlhthlu der lui ta thin a. Tawlhthlu thiam leh thiamlo kâr a hlain a nuihzatthlâk thin hle a, kan hlimpui thin hle a ni.

Aw..khâng hunte kha, a kum bi zâwnga han thliah tâkah chuan hun rei pawh a la ni lovin kum tam pawh a la vei lo asin. Mahse kan tunlai nun changkânna lama insêp kâng sâng dâwrh dâwrh hian khuarei dinhmun luahtirin tuanthu mai an chang ta si a. Khâng hun laia kan hlimpui kan inawmtleina thilte khân mizo tualzâl nuna naupangte rilru thianghlim zia kha thui tak a hril âwm e. Ni e, tunlai anga mahni ina inkhûr khung hrang a, khawvêl changkanna hmanrua hmanga mahnia inawmtlei tumna ang chi khân kan thinlungah hmun a la luah ve lova. A huhova nun chên zain hlimna kan intâwm a. Ãm taka nun hmangin chhùnzãnin kan inpãwlkhãwm thin a nih kha. Mahse, tunah chuan kawlah ni thar lo chhuak zêlin hun a danglam zo tawh a. Engtikah mah, khâng hun duhawm kha, rawn inher chhuak tawh lo tûra nunhlui ruamah pilin an thâmral riai riai a. Kohkir rual lohin mual an liam ta sia.

“Chung mu ianga lêng dêr dêrinchung thangvân sângah Romei zâm ri riai hnuaiah va chuan i ruam tin leh mual tin A saw raltiang khumtu tlâng lêr lûrah va tum ing e Tah chuan va tawng i maw nunhlui zamual liam tawh hnu Hlim lai rauvi thla tal châmin kei ka ring thin sûlhmun hluiah Hun tam liamin nun leh sûlhnu ral zêl e kir zai rêng rél lovin Hmatiangin hnutiang hnâwl tawm zel e khuarei chang tûrin Kei ka zuam love hlim laini tah lai changa tuanthua hrilh mai tûr Theih chang se, an sawi lota nupui ianga hnulam hawikirin Nunhlui mual thut-in chan mai nuam ing e chi khâwn lungah Lungza mah chhirin ka mawi lul love arang vaih reng ai chuan

…. han tih maite pawh ka châk rum rum thin. Khai, kan thupui kan pênsan thui lutuk dâwn e. Kan tum ram zâwk zawhin pawnto zai rêl leh ila. Fiamthu nuihzatthlak tak tak lakhâwmin ‘i hi hî hî tawlhthlûkah tia hlim taka tualchâi i’n tum tha leh teh zawk ang.

Engpawhnise, mi pakhat chanchin khurbîn puia thlûr ngawr ngawr ai chuan, mi hrang hrang chanchin lâwrkhawm ila, a ninawm dân a ziazâng deuh mahna.

Thuhriltu ropui, Krista sêngkhâwmpuina kawnga thawh hlâwk tak, chatuan lalram pasaltha Pu Lalkherha kha a hming chauh tal chu hre lo kan tam vak âwm love. A thianpa Pu Kawlbâwiha nên khân mi uangthuang leh fiamthu thiam tak mai an ni a. An pianthar hma kha chuan Lalho intawhkhâwmna-ahte fiamthua chawkhlim tûra an sawm thin bâkah, khaw hrang hrangin enge maw hun bik angahte an sâwm nasa hle thin a ni âwm e.

Vawikhat chu Khâwngbâwk khuain an Thalaite intihhlimna niah fiamthua chawkhlim tûrin an thian dûnin an sâwm a. Pu Lalkherhate lo kal avâng chuan, tumah ram lama feh liam awm bik lova awmni khamin nunau leh tar chhumchhia nên lam an khaw khêlmualah an pungkhâwm a. A khaw nawt tak meuha pungkhawm an ni bawka khêlmual chhûng hmuntinah mipui an ngâ tlûrh mai a.

An fiamthu thawh dân tûrah Pu kâwlbâwiha chuan ruahhmanna siamin; Pu Lalkherha chu Satel lemah an chantir a. A âwm leh hnunglamah thlangra dahin mau phelin an chep tlat a. Tichuan, satel angin mipui hmaah chuan bungbuin a kal ta tho tho mai a. A kal tan chiah tihin Pu Kâwlbâwiha chuan, ‘Ngawi t’u, a mei a la chhuak lo tlat’ tiin a zang a va phawrh sak ta a. Han khung leh mai tûrin thlangrain a kap tlata a banpha tawh bawk si lo. ‘Kawlbâwih, ‘khung leh râwwh’ a’n ti thin a. Ani Kâwlbâwiha lah chuan hre lo ang hmiahin lehlam a hawi daih mai si a. Tichuan, mipuihmaah pachang zahmawh thankin zet tawh chu zang lang thuah thuah chungin a vak kual ta tho tho mai a. Mipui lah chuan an nuih tak hluah hluah mai si a. Satel lema a chan zawh chuan, ‘Kan Kawlbâwiha tih dân chu, ngawi tak rawh u, a la hre ve khawp ang’ tiin Pu Lalkherha chu a inhrosa kûk kûk mai a ni.

Hun enge maw chen a liam leh hnuin Pu kâwlbâwihate nupa chu an thu inhmu lova inti taurauin annu chu a tlân a. Vawi tam an koh hnûah pawh alo haw duh ta dêr lo mai a. A mangang chu Pu Lalkherha hnênah kalin ‘vawi duailo kan koh tawh nâin lo haw a tum silo va. Nang nên hi chuan tleirawl chhuah phat atanga inzui ho, a bik takin nang phei chu a nêl êm êm, kan kâr thu chhia tha pawh a thlenna ber i ni a. Tunah zet chuan mang a ang ta takzet mai. Nang chiah hi ka innghahna leh beiseina neih chhun i ni tawh a. Tlâwmngaih chhuahin zânin chu i va koh ve poh dâwn em ni ang’ a ti a. Pu Lalkherha chuan, ‘E lungngai rêng rêng suh. In nu hi chu a cheng deh dân riau hi ka hria a nia. Ka’n koh ve mah nanga,a lo haw vat mai ang’ tiin a lo tawng thlamuan a. (Awm zel tûr) (He post hi vawi 173 keu hawn a ni tawh e.)

-R Lalchanchin Mawia

Zanriahte an han ei kham chuan, a dân pangngaitein Pu Kawlbâwiha chu a lêng chhuak leh a. Pu Lalkherha khân Pu Kawlbâwiha nupui chu koh ta lêmlo chuan khawi khawiah emaw a thep kual vel mai mai a. Enge mawchen a thep kual hnu chuan Pu Kawlbâwiha chu a lênnaah va zawng chhuakin ‘E.. chu chen chen lên te chu maw le? Va hawng tawh khai, in nu pawh a lo haw tawh kha. Saw pui, nu chhûr pui tawh si, mothar tehchâwk a inchan thar tha leh ni maw? Nang ber i lo awm bawk si lo nên, inlêng i lo fahran pawh thingpui lum tha ngam lovin pindanah a tawm tlat saw’ tiin a thingpui no dawm laklawh lai chu va turin a chhuahsan leh nghâl vat a.

Pu kawlhbâwiha chu tlânkhalhin a pindanah mua lûtin an khumah rizaiin a lo inlukhûpa. Pu Kawlbâwiha pawh a phûr ngang ni tûr a ni. Vai vawih aia rangin a lo thleng phei chawpchilh nghâl mai a. An inlênglo thu deuh tuai ho pawh chu be lûmlâm lovin pindanah a lût tlang nghâl a. Khuma rizaia inlukhûpa lo mu chu an nu emaw tiin ‘E, nu-i i lo haw ta maw, ka va han lâwm tak êm! Zanin atang ngeiin nupa nun thar kan din ang a. Keipawh i tân pasal thar ni tûrin ka in huam khawp a nia’ tiin rizai chu a’n keu va. An nu awzâwng ni lovin Lalkherha chu a lo mu kûk mai si a. A hrilhhai han hamhaih lai chu chuhin Pu lalkherha chu a tlân chhuak a. A ni Kawlbâwiha zak lutuk chuan a um chhuak nghâl a. Khawlai, zan thim leh nghalah pachang leh pachang an inthlûr ta ngian ngian mai a. A tawpah chuan Lalkherha hah lutuk chu lo thuin ‘chutianga han haw ngam tur bik i awm em ni? Satel lema ka chan tuma khawngbawk mipui khâ zozai hmaa min tih zah zia kha ngaihtuah ta che’ a lo ti chu an pahnihin an nui dûn hawk hawk mai a ni.

Hemi tuma an nu nên an intih thiam lohna ni âwma Pu Lalkherha sawi chu.. An nu mihlim a ni a. Chhûng inkhâwm an neih thinah an nu chuan Pu Kawlbâwiha chu hun hmang tûrin a ti ve thin a. Ani la piangthar bawk si lo nên a pha ziah thin a. A tur zing ta lutuk chu a ning ta deuh a niang, chawlhni tûk khat chu ‘khawi’nge ka’n hmang ve poh a nge’ tiin a ding hluai a. Lalpa beram tih chãngthlanin a fate chu, ‘Nangni hi berãm notê te in ni a. Kei hi a pa tiltawlh ka ni a. In nu hi..’ a ti hman chauh a, a sawi belh leh hmain an nu chuan ‘ho lutuk ho lutuk, fate u chaw ei kha siam nghal rawh u’ a lo ti vin tuarh a. Holam deuhin an tiltiak ta ringawt mai a ni ãwm e.

Hualngo rama rawngbâwla han awm thin thuhriltu lâr Pu Chhâwnluaia khan an chanchin a sawi thin a. Ani kha pa hmui themthiam zet mai, hmuh in ang rengah pawh sawi ngaihnawm thiam bik, tlachawp pawha nilêng daih tûr pâi reng kha a ni bawk a. Eng emaw zât te hi chu a phuah belhte pawh a ni nawk âwm e. Chûng chu a thena zâr i’n thur chhuak ve teh ang.

Khatia chanchin tha hrila an han awm kha, an mâwlmangin mi ningkhawng an man lo viau mai a. Bul tan nan lehkha an han zirtir a. Bang hnawih dumah A Aw A B a’n ziak a. Chutah ‘ka sawi zawhah ka sawi ang chiahin insawi ve dâwn nia’ tia ‘A’ chu kâwkin ‘A’ ti rawh u le’ a han ti a. Anni chuan ‘A’ ti rawh u le’ an ti rual ve ta thup thup mai a. Pu Chhâwna chuan kâwk leh va chungin A chauh ti tawh rawh ule’ a’n ti leh a. Anni ho chuan ‘A’ chauh ti tawh rawh ule’ an ti rual leh ta thup thup mai a. A zirtirtu tân chuan a manganthlâk duh hle âwm e.

Enge maw chen an inzirtir hnua ziak leh chhiar an han thiam tantir chu zirtirhbu an pe a. An han chhiara ‘Thangsira pain mai a lum e huiah, a zuan e huiah’ tihte, chu Pathian thu emaw tiin an tahpui ngâwih ngâwih mai a ni âwm e.

Tum khat chu, mual inkhâwm an hmang a. Pu Chhâwna’n Pathian thu a sawi dup dup lai chuan, thlawhna tê chi, kawptar hi a rawn thlâwk vû vû mai a. Hmâna paihte Mangchîna khâitu Murâ kha emaw tiin an tlân darh chum chuma ngaw kârah an pilbo zo ta vek mai a. Kawptar khalhtu chuan han biak lûmlâm tûr tumah hmu hek lo le, a thlawk chhuak leh ta ringawt mai a. A thlawh liam hnua an rawn chhuah khâwm leh chuan, ‘a lo kal leh huna a awh nân tiin pa pakhatin hnângdîlin thang a lo tungthlun a. An ngaihthat phah hlê hlawm a ni âwm e.

Zahmawh sawi hi an hrâtin nuam an ti êm êm mai a. An la mâwlmang ve bawk nên a hun leh a hmun thliarin thlu thiam ve tawh hek lo le, Inkhâwmnaah te hian zahmawh sawia nui kur kur tâwk an kat nuk mai a. Vawikhat an inkhâwm pawh, kil khata pathlâwi rual thu khâwmin thusawi ngaihsak lo lêka zahmawh sawiin mipa thil leh hmeichhe thil an lo sêp rawtui ve khawp mai a. Pakhat chuan ‘ A’n châk tak tak hi chuan mi hi a rawn râwn do mai a. Kutke phei chu nei sela, mahnia leipui vêng tham a niang chu mawle’ a ti a, an nui kur kur mai a. Pakhat leh chuan, ‘hman zân chu kan nu thil ka enchian sak e ka ti a, a khabawr a lo tam khawp mai a. Rawh ung thial thualin ami sa tiin zuar ila. Khawi maw laiah chuan lei duh tâwk an awm maithei a ni’ a ti a. An thûm leh hak thin a. Pu Chhâwna chuan inkhawm hruaitu chu khap tûrin a’n ti a. A ni chuan va auin ‘Ngawi tawh rawh u, in sawi ho ngeu ngo e mai. Zunte pawh in tichhuak rum rum alâwm. Khawi’nge ka va zung pîpû duah teh ang’ a la ti hrâm a ni âwm e. (He post hi vawi 241 keu hawn a ni tawh e.)

-R Lalchanchin Mawia

Biak ina an inkhawm laia thusawitu’n tui taka kalvari tlang chanchin a sawi dap dap laite hian inkhawm hruaitu hian ring lêng lâwngin ‘Nu ho kha thu tha rawh u. Pa hovin an awt ang e’ te hi a’n ti ta mai thin a. Thusawitu tân pawh khîk vur vur mai a awl duh viau âwm e.

Chutia, zahmawh sawi an hrât lutuk chu dik lova hriain ‘Biak ina zahmawh sawi hi a mâwi lova sawina hmun tûr pawh a ni hek lo. Chuvangin sim tawh ula a tha ang’ tiin zahmawh sawi chu an khap ta a. Anni chuan awlsamtein ‘ni e ka pu, kan sim hmak ang e’ an ti ve mai bawk a.

Chawlhkâr khat hnua an va kal leh chuan, ‘Zahmawh sawi in la hrât em?’ tiin an han zâwt a. Anni chuan ‘hrât tawh love ka pu, hmanniah pawh inkhawm laiin nu pakhat a thusuala kan haw tir daih an lo ti a. A hnu chawlhkar khat vêla an va kal nawn leh chuan an kohhran hruaitu hlun, an upa min ber chu an lo thunun (dân pawna hnawtchhuak) a. Heng hun lai hi chuan kekawr la ha ngai hek lo, inkhâwm kaihruaitute pawh hian puan an veng mai thin a. Pu Chhâwnate chuan ‘A engti tiha upa min berte thunun ngawt nge maw in nih le?’ tiin an han zawt a. Anni chuan ‘Inkhawm hruai laiin a puan ven do pâwng a lawm’ an ti a. A makpa kil khata lo thu ve chuan ‘Ka pu, a thiam loh pawh a ni bik lo. Nu ho vang vek a lawm. Inkhâwm laiin an thu duhdah lutuk a nih kha’ tiin a thlavâng a lo hauh sak a ni âwm e. An sim hneh hmêl khawp mai.

An thlanlunga an thu ziahte hi a’n hoin a’n mâwlmang thei khawp a.’A damlaiin chûmi chu a ngâi a. Chûmi pawh chu a ngâi a. A sandamtu (chhandamtu) tawng maw tawng lo maw?’ tihte mai mai hi an ziak a. Thanlung thenkhatah chuan ‘Dara, hlo thlawh laiin a thi. Hei hi nilaini a ni. Thi ta lo ang se chuan, a thlawh zawh tawh hi vantlâng rin a ni tih te, ‘A damlaia a thiltih that te:- ‘A, Aw’ a hrechhuak, tumah a hau lo. Vawmtlâk pawh a siam thiam’ tih te, Savawm nên an intâwka a melh zâm a vangin hmana thi tawh tûr kha tûnah a thi ve chauh a ni’ tih te leh ‘A damlaiin lung dêng thui ber lâwmman pakhatna vawithum lai lâk a tum tawh’ tihte mai maiin an tial râng ve buai a ni âwm e.

Tûnhma Sialsir khuaah khân parâwnkâi, hmangchâng hre tak tak kha an kat nuk mai a. Chunghoina remchâng an han lei thiamzia leh an ngaihtuahna an chhawr tangkai thiamzia mawlh mai kha, a hunlai ngaihtuahin hahîpa sawi tham zu tling ve tlat amaw le..!?

Tumkhat chu YMA-in sumtuak dân tûr ngaituahin ro an rêl a. An president Pu Thangkhuma chuan silima (cenema) chhuah a rawt ta tlat mai a. A rawttu, amah Pu Thangkhuma ngei pawh chuan, a hming leh an chhuah thin tih bâk chu eng ang chiah nge anih a hre bik dêr bawk si lo va. Bangbo hlawm viau mahse, hotupa berina rawt ta tlat chu tiin lungrual takin an remti tlâng ta a. Tichuan, tlangau ruaiin khawchhungah an au kualtir a.

Tlangau chuan, ‘khâih khâih khâih..lo ngaithla theuh rawh u. Mister LMA (Minister MLA) in silima chhuah tûr YMA a pe a. Zaninah YMA rûnah chhuah a ni dâwn a. A en man chu buhfai sêr khat a ni ang’ tiin a au a. A hming chauh chu hre hlawm mahse, eng ang tak nge a nih hre miau hek lo le. Naupang chu sawi loh, puitling leh tar kiring chenin an en châk chu, naupang sa hmeh tûr ang maiin an za sek tawh hlawm a. Zanriah chaw eikham vêleh YMA rûn kawtah chuan, a khawnâwtin an tlim hmur tawh mai a.

Tichuan kawngka pâwn lamah leh chhûnglamah vengtu insiam a, pakhat tê têa luhtirin ‘Tikhân i va lût ang a. A lai takah khân thlangrâah changêl hnahin kan khuha, va en mai rawh u’ an ti a. Va lûtin thlangra khuhtu changêl hnah chu an han keu hawng a. Bawngêk tum lian tha tak mai hi alo thu luau mai a. ‘A va ho mai mai e aw’ an han ti nang nang a. Mahse, chhûnglama vêngtu khân tumah hrilh lo tûrin a lo hrilh zêl a. A hnuhnung lamah an hotupa ber Pu Thangkhuma nu, pitar kum 80
ralkâi tawh pawh chu, thei leh thei lovin a rawn inhawl chho ve tawi tawi a. Kawngka bula lo awm Pu Thangkhuma hnênah chuan ‘Bawiha, khaw maw..in thil chhuah chu ka lo en ve ang e’ a ti a.

Pu Thangkhuma chuan ‘Aw, Ka nu hi chu i va’n hâwkdâk tak êm. Tarte chuan en ve ngai em maw’n le’ a lo ti a. A nu lah chuan ‘A hmuhnawm in ti sia ka en ve châk alawm’ a lo ti sam et mai bawk si. Midang khã zât luhtir tawha a nu han luhtir loh bik chu tih chi niin a hre bawk si lo. ‘tikhân va lut la, thlangraah changêl hnahin kan khuh kha va en mai rawh’ a ti a. A va en nâk chuan bawng êk tum lian tha tak a lo thu luau mai si a. Pawn lam kawngka bula thu a fapa chu va auin ‘Bawiha bawng êk mai mai alawm maw le. In va han ti ho mai mai tak êm aw’ a va ti lêng lêng mai a.

A au ri chu hriain a dawt chiaha luh tum, nghakhlel taka kawngka bul sêta lo thu, Pu Thanchhûma chu a lût ve duh ta lo va. Pu Thanchhûma tih loh chu, a khawnâwtin an en kim deuh vek a ni âwm e. Buhfai pawh tam tak hmuin an lilâm leh a. Cheng sawmhnih lai an hlawhchhuak a ni. Chung hunlai chu pachangin nitla vanvuaia cheng hnih an la hlawh lai ngang a ni a. An hlawh tam dân chu i chhût thiam ve ruak ang chu maw? (He post hi vawi 532 keu hawn a ni tawh e.)

-Andrew Lalchhuanawma

Hmeichhe tana hriattur pawimawh zual deuhte I han thlur teh ang. I tunlai em? I changkang em? lo chhiar phawt mai la.

1. A hmasa berin bialpa i neih a ngai a,
I bialpa nena thla inlak dunna facebook profile picture-ah i hmang ang.

2. Facebook i ngainat ang huin textbook erawh i ngaina lem lo thung ang.
I note book-a ziah tur i haihchham lai pawhin i facebook status-ah erawh i ngaihzia i thai tial chuai thei thung ang.

3. Bike-a chak taka a phur kual thei che a nih phei chuan i hawisang hle tawh ang.
Thlalakna reng rengah in inhualna zungbun i tilang thin ang.

4. A degree neih san leh san loh lam ai chuan a indah san leh san lohin kori a tu ang a,
A lehkha thiam leh thiam loh lam ai mahin khawlai cheng a man leh man lohin i lungthu a kuai ang.

5. I chhas chu music video-a lang ve tawh tal ni thei se,
A lo ni lo a nih pawhin SWAG tak!
Ama thawhchhuah ai chuan a chhungte thawhchhuahin ningkhawng a nei tih hriat tur.

6. Tu khaw-i hriat lem loh show-ah model-ah i tang ang a,
Magazine cover-ah a pawimawh chin chauh cover-in thla i la ang.

7. Neihthinglungkhawng tak meuhin scooty i lei ang a,
Traffic tawt tak karah pawimawh hmel deuh rilru thawl tak siin i lengchhuak ang.

8. I thlalak sexy tak facebook-a an post chuan a ruk takin i intithei hle ang a,
Bus-a chuan ai chuan kea kal i thlang tawh zawk ang.

9. Sunday chu fashion day-ah i thlak ang a,
I IQ sang lo mah se i pheikhawk tal a sang tur a ni.

10. Mizo tawnga i thumal ziah chhiar a har hle tur a ni. (He post hi vawi 215 keu hawn a ni tawh e.)

Mizoram politics transfer bazar a intan mek e zel e. Nimin, September ni 5 khan Congress chuan MNF atangin an Youth Team Coach K. Laldinthara (Mapuia) an lalut a, engzata lakluh nge puanzar a ni lo. Mapuia hian MNF Youth Team a enkawl chhungin vawiduailo Congress an lo sawp tawh a, Congress striker Pu RL Pianmawia, Pu Lalrinliana Sailo leh Pu KS Thanga te tan a tawrhhlelhawm hman hle. Chutiang khawpa MNF Youth Team lo hrual tawh a nih avangin MNF weak point a hre hle tura ngaih a ni. Congress hian Youth Team an enkawltir dawn em, hriat a la ni lo.

Congress lam hian fans an neih belh nasa hle niin an sawi a, hmun hrang hrangah Congress tantu an pung zel niin an sawi. Chutih laiin MNF fans an ngah tawk thu leh players awm sa an neih that tawk chu an sawi bawk a, players zingah pawh first team nih inchuhna a nasa hle niin a lang.

Hetih lai hian team tê zawka ngaih ZNP leh MPC lam hi players lakluh lamah an thawm a la reh hle a, ZNP hian players pawimawh ni tura sawm hi an nei nual tawh nia hriat a ni a, transfer last day-ah an lalut teuh thei ang em, an mamawh phuhru theitu tur mi an hmu zo ang em tih hi mipui zawhna a ni. MPC pawhin nomawi an chawi a nih chuan êng lamah tan lak an tum thu an sawi ngawrh ve hle bawk.

Mizoram politics bazar a hot ta telh telh mai le! I lo thlir zel ang u. (He post hi vawi 720 keu hawn a ni tawh e.)

-Mastea

Season 1:
A vawi khatna a ni bawk a, a boruak a pui hem hem hle. Dawrpui Vengthar tlangval Lalchharliana chu LPS Comedian Search hmasa bera pakhatna atan thlan a ni. ‘Mawia Leh Rinzuala’ a lar hle a. ‘Hnawhtawt’ vanga kan hmelhriat Roluaha chuan ‘Fapa Tlanbo’ hmangin Zoram khawvel a rawn deng chhuak a. Tun thlengin a boruak a la dai thei lo a ni ber e. Anni bakah hian Lalchhanhima, Remsiamliana (L) leh C.Vanlalduha te chu hemi kuma fiamthu palian langsar deuh te chu an ni.

Season 2:
Kum hmasa lama a thihchilh bomb paipuah tuar lo Roluaha kan hmu leh a, hemi tum zet hi chuan tu tan mah chelh din zawh rual lohvin champion lallukhum a khum chiang hle. Mizo fiamthua theihnghilh tawh ngai loh tur fiamthu tha tak tak (ho tak tak a ni zawk mah ang chu..he he he) a hnutchhiah hnem hle. Hemi kum hian C.Laldinpuia, K.C Tluanga leh T.S Khupchong te chu a palian zual deuh te an ni.

Season 3:
Hemi kum zet hi chu contestant te an tha tlang hle. A vawi khatna atan tlangval ni lovin lallukhum a khum a. Durtlang pa C. Lalduhawma chu pakhatna a ni. Hemi kum hian han lar fal an awm lo va, final thlengin pakhatna tur rin thiam har khawpin contestant te an inbeitawk a ni. Zoramthanga Hmar, C.Lalrinawma leh Lalngaihsaka te a palian fal deuh an ni.

Season 4:
Comedian Search awm tawh zawng zawnga contestant te an inbeihtawk ber tum a la ni hial ang tih turin an tha tlang. Buarpui tlangval PC Laltanpuia a hit lawr lak a. Ani bakah hian Kawlchaw ‘W’ tlangval vai tawng hmang nasa T. Vanlalmalsawmpeka leh Tawipui ‘S’ tlangval Rochansanga te boruak a lian hem hem hle bawk. An ni bakah hian Ngopa atangin veteran C.Lalramlawma (sipai tê chi tia kan hriat tak) chuan thudik awm sa hmangin min tinui hluah hlauh bawk a, kum hmasa lama milian Lalngaihsaka paw’n a la chhiat lohzia a lantir chiang thei hle a. A tawpah chuan Durtlang North patuai Lalhmangaihzuala chuan ‘Valtea’ chanchin hmangin champion lallukhum a khum ta a ni.

Season 5:
Kum hmasa aiin tlemin boruak a dai deuh em aw tih theih a nih laiin contestant te erawh tha hem hem tak an ni. Kum hmasa lama milian PC Laltanpuia te meuh pawh zah zo lo mi thar rual an han inel tak tak chu pui tak a ni. Thingkah tlangval Lalhlimawma te’n rang tak taka fiamthu an rawn thawh zawt zawt laiin, Ramhlun lam atangin Lalnunsanga te’n muangchangin fiamthu an rawn thawh a, a nuihzatthlak em em vek bawk si. Hemi kum hian an fiamthu thawh laia nui lo tura mipui khap tawp khawpa nuihzatthlak Lalnunsanga, Kanan tlangval kan han hmu te kha a pui dangdai teh a nih kha tirawh u? Anni bakah hian W. Phaileng tlangval Laljoela te, Serchhip Sailiam tlangval Malsawmtluanga te, Tuahzawl pa Lalhmingmawia leh Dinthar tlangval samsei hnap mai Lalduhawma te kha pui hlawm thiau thiau tak an ni. A tawpah chuan a nu kawr pawh inhmeh taka ha thei Lalnunsanga, Ramhlun North kutah champion nomawi hlan a ni ta a nih kha.

LPS Comedian Search chu Season 5 hman zawh a lo ni ta reng mai a. Tun kar Zirtawpni (24.10.2013) atang hian Season 6 atan intihsiakna an han bei leh tak tak dawn chu a nia, pui tak tur hi a ni tawp mai a ni. A kum telin fiamthu a tha tawlh tawlh emaw tih tur a nih avangin kumin chu a pui ngawt ang le…

Nang, season engzatna hi nge HIT i tih ber le? (He post hi vawi 1910 keu hawn a ni tawh e.)

Dear Mahruaii Kullai,

How you?..I’m good e tunlai chu. God willing, xmas chu ka lo haw maithei, mahse Hyderabad hi a nuam ve reuh lutuk a i hria mai em..its very happening ve tlats. Lo visit rawh outing ah kan chhuak dawn nia. I hria em..class chu ka attend lo mai ang. Chuan nimin chu movie kan kal a uii..ka enjoy tops. I hria em xmas lo haw ka chak nachhan chu veng tin church ah khan feast a awm leh ngei awm sia..a christmas spirit ka ti e…

I chhas nen khan in la going steady em, a ‘man’ ka ti tops.. handsome bawk si..i hre mai em..uiii kei chu relationship pawh hi ka priority list ah ka dah hman lo..its so boring a ni tops..disco leh pub kal pawh ka feel like lo..i hria mai em..ka chak chu Mizoram-a lo haw a village vela tour neih paha travel vel kha, hmana kan va visit village kha enge kha? thingtlang children ho cute zia kha…an snaps pawh ka la safekeep reng, hetiang hi a precious ka tia kei chu.

Next weekend chu Himayatnagar a i uncle ten dinner ah min invite a, free time ka neih chuan ka va turn up ve ngei ngei ang. Ka schedule hi tight lutuk a. An menu hi a delicious thei sia a nuam thin e..an cooking hi mizo taste a nia i hria em..

Awi enough tawh mai ang mizo tawng hi ka use khat lutuk a ka confused tlat..Do send me a letter dawn nia aw..Ku Rova, Aldrin leh Michael Z. Silvera te i meet hlauh chuan min lo wish dawn nia..Top-up man min rawn thawn ngei ngei rawh se. Ciao..see you phawts..helmet ka lo hawn ang che nang chu ride i enjoy em mai..

Bye…Miriami Pautu
H’Bad (He post hi vawi 445 keu hawn a ni tawh e.)

-Dev Anan Ralte

Cowboy pakhat hi eng emaw tul avangin Texas pel rawkin a zin a. Khaw pakhatah hahchawlin bar-ah beer a in khal khal a. He khua hiam mikhual tihbuai an chîngin an sawisa a, an rawk chiam thin a. He Texan pawh hi an dim bik hauh lo vang tih chu tlang rin dan a ni.

A chhawlhâl a tireh ta maw tihah chuan bar chu a chhuahsan leh ta chhak chhak a. Pawna a’n chhuak chu a sakawr a awm ta hauh lo mai. Engtia tih tur nge ni ang tia a ngaihtuah vang vang hnuah bar-ah chuan muangchangin a lut leh ta a.

A puakruk a phawi a, en miah lovin inchung lam chu a kap pawp pawp a. Chutah ṭêng chhuai mai hian, “Tunge ka sakawr ru che u? Tunah hian beer tlemte ka in leh dawn a. Ka in zawh hnua ka sakawr a awmna pangngaia a awm lo a nih chuan Texas-a kan chêt thin dan angin ka che ang. In hria em?” a ti tuar tuar a. Muangchangin beer chu a in belh leh ta a.

Bar chhunga awm vete chu an hawi phâwk ta hra hlawm a. Texas cowboy rothapzia leh pawisak nei lo an tamzia an ngaihtuah a, an awm a nuam chiah lo a ni.

Beer a in zawh hnu chuan muangchangin a chhuak leh ta chhak chhak a. A sakawr chu a thlunna hmun ngeiah chuan a lo awm a. A sakawr chungah chuan a chuang thuai a, kal mai a tum lai chuan bartender chu a rawn chhuak a, inthlahrung leh hlau tih hriat zet hian a meng khup dai mai a.

“Ah! Amigo, engtin nge Texas-ah chuan in chêt ṭhin a?” tiin a rawn zawt a.

Texan pa chuan, “E le, ka sakawr an rûk miau chuan kein ka kal mai ang,” a lo ti daih a. (He post hi vawi 103 keu hawn a ni tawh e.)

-LV Michael

Khawvel hmun hrang hrang an pan a, a natna an hreh fuh thei si lo. A tawpah chuan ‘bei nge sei rundung’ tiin doctor upa leh senior experience ngah deuh tawh hi Pope chau tawh tak mai chu entir turin an hruai leh ta a.

Darkar khat vel a ‘exam’ hnu chuan cardinal-te chu ko khawmin doctor chuan a damlohna/natna chhan chu a hriat thu a hrilh hlawm a. Thu lawmawm vak lo chu Pope natna hi natna vâng tak mai ’tilmu (mipa artui eh!) natna’ a ni a, mahse, thu lawmawm deuh mai chu tihdam theih a ni. Damdawi leh therapy tih vel a ngai lo, s dam that theih nana Pope-in a tih mai tur chu hmeichhe mutpui a ni.

Tichuan ‘thu lawmawm’ chu cardinalho chuan rei ngial an khel bap bap hnu chuan doctor chu hruaiin Pope hnenah chuan chanchin lawmawm lo leh lawmawm chu an hrilh ta a. Pope chuan eng emaw chen a ngaihtuah hnu chuan a dam theihna tur a nih chuan tiin hmeichhe mutpui chu pawi a ti lo va, mahse, thil 4 in vawn tlata min tihsak a ngai ang, tiin a cardinal-te chu a hrilh a.

Pope thuthlukna an hriat rual chiah chuan cardinalho mak ti leh tha leh tha lo ti inhnial chu an phun ta mur mur mai a. Chumi ri mur mur kar atang chuan aw pakhat hian, “Eng nge chung thil pali chu?” a han ti chu room chhung a reh ta dak mai a.

Pope chuan hetiang hian a lo chhang a.

“Pakhatna atan chuan hmeichhia chu a mit a del tur a ni. Tunge mutpui tih a hmuh theih loh nan.
Pahnihna chu a beng a ngawng tur a ni. Tunge mutpui tih a hriat theih loh nan.
Pathumna chu a tawng thei lo tur a ni. Engtin emawni tunge mutpui tih a hriat chhuah hlauh pawh a sawi chhuah theih loh nan.”

A tawng tam avanga chau chu hun eng emaw chen an nghah hnu chuan kil khat atang chuan, “Eng nge a palina chu?” tiin Pope chu a rawn zawt a.

Pope chuan nuih sak pahin, “A hnute a lian tha tur a ni,” a ti ta a. (He post hi vawi 127 keu hawn a ni tawh e.)

-Lalrin Dika

Kum 20 an inneih tawh hnuin zan khat chu a nupui chuan a pasalin a rawn khawihdan vel chu danglam deuh har hian a hria a.

A nghawng vel a rawn khawih lai chuan a mur deuh uai uai a, tichuan, a hnungzang lam chu a pasala kut chuan a zut thla leh tan ta a…

A dar vel chu a rawn zut tha leh ta a, a zut thla ta zel a, a hnute vel chu a rawn zut thla leh a, a dul bawr velah chuan a zut chu a titawp ta a.

A hnuah chuan a kut chuan an nu banbul chhung lam chu a rawn zut leh tan ta a, a hnute sir vel chu a zut thla leh ta a, tichuan, a zut thla zel ta a, a kawng bawr vel chu a rawn zut leh tan ta a, a mawngbawr vel chu a zut thla leh ta a, a mal chu a zut thla ta zel a.

A hnuah chuan an nu malpui chhung lam chu dimtein a zut chho leh tan ta a, a mal tawpah chuan a zut duhtawk ta a. A hnuah chuan a malpui ding lam chu chutiang bawk chuan a rawn zut chho leh tan ta a, a kapkar a thlen dawn tep chuan a duhtawk ta deuh thut a, lehlam a hawi deuh vut a, TV a ensan ta daih mai a!

A nupui chu chutianga a han zut ta chu a lo zauthau hman khawp mai a. Aw sexy tak mai chuan “Awi! A nawm tehreng nen, engvangin nge i tawp ringawt a?” tiin a zawt sap a.

A pasal chuan, “Remote ka zawng alawm!” a lo ti vei hmuk a. (He post hi vawi 206 keu hawn a ni tawh e.)

-Ramenga Vanchhawng

Ka tetlai atang tawhin lemziah lam hi ka tui em em thin a. Ka rough book phei chu milem hlirin a khat thin. Textbook leh notebook pangngaiah pawh phek 5 dan velah hi chuan eng lem emaw tal hi a awm deuh ngei ngei a.

High School kan han kal chho va, meizial tui ti khawpa kan zûk ve hnu chuan lemziah paha meizial han pak hlet hlet khan ziah nalh hi awl bîk riau te hian ka hre thin. A inhmeh phian reng bawk a.

Zan khat chu ka inkhawm a. Sermon lai hian tlar hnung lam deuhah hian ka thu a. Sermon lam pawh ngaithla lem lovin hlabu hnungah milem ka ziak mai mai a. Chutia ka ziah lai chuan ngaihtuah miah lovin ka iptea ka cigarette ah chu ka phawrh a, ka hmuiah ka dah hman tihah hian ka bula thu patling hian rang lutukin min lo pawhthlaksak hman hlauh! Khami tum kha chuan zak ve ngai lova hi ka’n zah ve chu! Kha ka bula thu khan tun thleng hian inhmuh apiangin ‘Khaw’maw Cigarette chu?’ a la ti ziah!

Khata tang khan Cigarette ni lovin a lemziah lam zawk hi ka chawlhsan hlen ta a ni. (He post hi vawi 29 keu hawn a ni tawh e.)

-Ex Tetea Misual

Ka chechhia a ni mai lo, ka piangchhia ni ber hian ka hre thin. Ka pian pawh hi a Amitabh deuh ruih mai a, tahkhua a sei thlawn takzet a ni. Tuiah pawh tlahlum ila ‘a kanghlum’ an tih tur chi te kha ka ni ve hian ka hria a, chuvangin tuiah hian ka cheng ve ngai meuh lo. Sapramah pawh piang mah ila, mihang kha ka nih tho tho dawn avangin a hlu tehchiam lo va. Mite’n Abraham Lincon an ngaihsan theihna tura mitang a chhuahte zingah khan ka tel ve ngei tho ang.

‘Misual’ min han ti hi chu ka hrethiam, ‘misual dum ber’ min ti kher hi chu hriatthiam a har a ni. Mahse, han dem em em chi pawh an ni chuang lo va, a chhan chu camping a ka luhpui thinte khan min councelling a, pastor ni tate pawh an awm nawk a ni.

Mahse heti chung chung pawh hian ka thuziakte pawh in la chhiar ve hi..!

Ni e, Mithuna ang tur khan theihtawp chhuah ve thin mah ila, upa zawkte kan ngam ngang si loh avang khan Amrish Puri leh Shakti Kapoor te kha kan ni ta fo va, changtunu kan man ve paw’n ka u khan a rawn chhanchhuak zel thin. Dim miah lovin min han tlawh pawp a, ‘aahh’ tih pahin kawngsirah kan hlawm phei pawp thin a ni. Changtunu ber ‘bachauuu’ tia a au tawh kha chuan ka u kha a rawn tlan phei char char a, film a tawp chu a ni deuh der zel! Khatiang khan zantin hun kan hmang ve a.

Eng nge ka tan khan hlawkna awm, tih leh eng nge ka tan khan nawmna awm, tih kha ka ngaihtuah let pawh hian ka hre chhuak zo tlat tawh lo.

Sipai nih tum vang em em pawh ni chuang lovin indo kha kan uar angreng viau a, chutah pawh chuan arsi bel lo pawlah min dah zel avangin ‘dre dre dret..i thi’ min ti a, haw chuang si lo khan thiante indo lem kha ka en reng thin. ‘Ka thi lo, ka banah alawm min kah!’ ka han tih ve pawhin ‘i nakah tak alawm’ tih leh min nam lum an rual ta mai thin a, hahthlak ve thin khawp mai. Vawi khat erawh chu an bunker lemah chuan ka e ta nghek mai a, ek atang ringawt chuan ka ek a ni tih an finfiah thei si lo! An investigation report-ah kha chuan ‘A uih’ tih zawng kha a ni tawh mai.

Mi fate’n ngaihzawng an nei thin tih ka hriat ve avangin neih ve ngei pawh kha ka tum ruh tlat a. Mahse, min duh ngei ngeitu tur ka zawn a ngai thung dawn. Ka hmu ve ta ngei a, mahse, a enkawl chhoh dan ka thiam lo nge, ka duhtawk hmain min kalsan leh mai thin. Ngaiin au mah ila, ‘a tawk e Lalngo’ tih kha hang hle mah ila kan chantawk a ni tawh mai. An pasal neih dawn tawhah pawh mittui kan hru ta fo mai zel kha a ni si a. Lo kir leh mah se kei paw’n ka pawm bik tawh lo vang!

Football han khel ve dawn ila, substitute te bulah min thuttir mai zel a, khami vang kha a ni ang ka lut ngai meuh lo. Ka tel ve chhunah lah ka pet vak a, ‘mahni pet liam chhar’ an lo ti leh si a, ka pet zo chiah khan ka um thla nghal fua fua a ni tawh mai. Hahthlak ve thin tak a ni. Volleyball khelh lahin service tupa hnungah ka ding fo va, a awmzia chu an lo ben liam apiang kha ka lo chhar dawn tihna a ni. Chechhetheia.

A zualpui chauh a la nia aw…! (He post hi vawi 189 keu hawn a ni tawh e.)

-Maro Colneya Bungsut

Facebook-ah chhass i nei duh em? I neih duh chuan i nei thei a, i neih duh loh chuan a pawi chuang miah lo. Mipa thenkhat tan Facebook chhass emaw hi neih a har phian a, a zei tan erawh thil awlsam sawina a ni thung. Hetih mek lai hian hmeichhe tan erawh chuan duh leh duh loh a ni thung ang. He thu kan chhiar tur hi ‘long term policy’ a ni a, hman thiam a tha a ni.

Facebook chhass chu engtin nge kan neih tak ang le? I han tum teh ang. Fuh tak mialin. A hmasa berin i propic khan a zir a ngai ang. I hmel kha tha teh vut lo mah se i phone camera khan han inlak mial mial phawt teh. Style hrang hrang khan han ti kual la, vawi 30 i lak meuh chuan i lan thatna ber kha a awm hrim hrim ang. Propic atan chuan lan thatna ber kha i thlang keuh dawn nia. Facebook hmang zawng zawng leh camera hmanga thla la zawng zawng hian mahni lan thatna hi a nia kan duh ber. Hrethiam mai em? I lan thatna ber kha i la duh tawk lo a nih chuan han ‘edit’ leh hlek la. Engtin? E le, a brightness kha pe pawp mai rawh. Chutianga i la lang tha lo fo a nih chuan ‘i hmel kha edit theih loh khawpa chhia a ni ang’ ka ti ngam sak.

I propic i edit zo ta. A dawt lehah chuan i relation kha ‘single’ a ni ngei ngei tur a ni. Tin, hei hi a pawimawh a nia. A bak dang chu a tlachawpin aw. Tunge i ‘bem’ tur chu le? I duh duh kha i bem thei. Mahse, i hmel kha hre hmasa rawh. Tha tawka i inngai a nih chuan hmeltha deuh i bem thei. Hmeltha vak lovin hmeichhe chhe lo deuh i va ‘bem’ ngawt chuan a tha berah thian thaah a lo chhuah ang che. Chuti a nih loh vek chuan a ‘block/unfriend’ hmak mai ang che. Chu chu a nia, hmeichhia hi an chhiatna. Mahse, mahni ngam tawk hi chu ‘automatically’-in a rawn lang mai.

I duh i thlang fel ta. I duh thlan kha pakhat chauh pawh a ni lo thei. Sawm pawh thlang rawh. A pawi miah lo. Facebook a ni tlat. Inbox lamah ‘I va chhe lo ve’ va ti nghal ngawt suh. Lawm i hlawh lo ang. Engtin nge i tih dawn? A propic emaw, a thlalak upload zinga like leh comment tlem ber kha han like/comment keuh teh. Hmanhmawh suh. Hmanhmawh hian thil a tikhawbaw thei. A propic azirin uang lo leh thu tak, over miah lovin han comment la: ngai teh, hmeichhia hian fak an lawmzia i hre thuai ang. Lawmthu a sawi ngei ngei ang. A wall-ah chuan han fak zawm leh hlek la, mahse, i over palh ange aw, hei hi a apawimawh a nia.

Chuta tang chuan a status neih apiang chu han comment keuh keuh zel la. Inbox lam hmanhmawh vut vut suh. Wall lamah i kawm nel phawt a ngai. Kar khat vel a thlalak leh a status i comment-sak tawh chuan tunge i nih kha i insawi ngai lovin a hre dim diam tawh ang. Hmeichhia hian anmahni faktute hi an ngaisang ru tlat. A ngaina che emaw a nih chuan a rawn inbox hmasa maithei che a ni.

Tlangval/pathlawi zei tak i nih paw’n tawngkam thlum tak taka i biak kha a tul lem lo. Zei lo tak tan pawh a tawka kawm thiam atha mai. Zei nih tum loh tur, biak danah a sakal zawng zawn peih hi a tha a nia. Tlangval, chutianga i hmeichhe biak emaw, a status i um zui viau tawh hnu pawha a lo la be tha lo che a nih chuan thil awmzia man thiam la, midang biaksan rawh. A nih loh paw’n muangchanga ‘bem’ atan khek mai rawh.

A thupuiah i lut teh ang. In innel ta maw tihah inbox lamah bul i tan dawn ta. Polite va chhuah vak pawh kha a ngai lem lo, wall lamah in inbiak nel tawh chuan. Chhass tur ang chiaha biak dan hi khawi ram ‘University’ mah hian an la zir loh vangin a buaithlakna lai tak a ni.

Zan lamah i lo ‘online’ ta a. A hrin vet vet chuan, ‘Hi, i chhass a mu tawh em? emaw, a lo leng em, a online em?’ te emaw va ti tawp teh. Hei hi a pawimawh a nia. In innel tawh vanga zawt i ni miau a. Chhass a nei a nih chuan, leh hmeichhe pangngai tak a nih chuan a zep lem lo ang. “Online e,” emaw, “a mu chiah,” emaw a lo ti hlauh a nih chuan midang i biak nel sa bawk kha chutiang bawka va bem leh mai tur. Har lo lutuk.

Hmeichhe chhass neih duh tak a nih chuan, “Chutiang chhass ka nei lo reng reng,” a lo tih hlauh thei. Chutiang a nih chuan mutchhuak lo turin i hmaite pawh va phih la a pawi lo. “Ka awih lo, nangni ang hmeltha deuhin in nei hrim hrim ang,” te pawh han tih luih talh a pawi lo. Chutianga han tih chuan, “Kan hmeltha lo lutuk a, tuman min duh ve lo,” an han ti tak naa, a lawm ru veng veng zawk ang. Inlakzei thut pawh a pawi lo, “Chu dilna a rawn thehluh theih a ni maw?” han ti la, ani chuan a hrethiam dawn lutuk tlat. ‘Rawn theh lut rawh’ a ti pawp kher lo ang, a chhan chu ‘easy’ nih kha hmeichhia khan a duh miah lo. ‘I rawn thehlut mai dawn maw ni aw!” te a han ti kual vel ang a. Chutiang tawngkam tha i hmuh chuan rizai hnuaia nuih sak pawh thil pawi lo tak a ni.

A tuk leh zanah i hring em, tiin chat list a bih duk duk tawh ang. Hmangaih thu leh duhthu inhrilh kur luk hi tun lai kan nula fingho hian an ngaithei lo riau. A ngainat bak cheah leh a duh che em, tih chu nangmaha nangmaha chhia leh tha hriatna thiang tak Pathian-in a dah hmang khan hrethiam mai rawh. Chu pawh i hrethiam thei lo a nih chuan i lengtar hrim hrim ang.

I inbox a nghahhlelh viau chuan a ngaina che a, a lo duh ve che a ni mai a, nangman i chhanlet rana ani a muan viaua i bem tih pawh a hriatthiam mai loh chuan a duh lo che, tihna. Tu emaw, a thiannu bulah emaw, hepa hian min ‘try’ a ti ngei ngei dawn. A duh che a nih chuan a sawi chhuak phal miah lo vang. Hmeichhe awmzia hi kan hriat kar a ngai. A ngeiawm thei teh mai a nia.

In inbiak nel viau tawha nangmah paw’n a ngaina chea a duh deuh che nia i hriat chuan, “I va ngaihawm tak!” han ti keuh teh. “Chutia mi?” a rawn tih satliah chuan a la duh tak tak lo che. “Kei paw’n ka ngai che alawm,” a rawn tih vaih chuan lawmin vawi thum zuang mah la, a pawi miah lo. I thikthu han tichhe der la, a chang chang erawh chuan han zau viau la, a ngaisang em em mai dawn che a ni. A va han tha tak em!

In inbiak ‘Ck’-na pawh a lo rei ta. Inhmuh hi a dan a dang. Facebook chhass hrim hrim i duh a nih chuan hmu duh suh. I hmel a chhe sia, a be zawm duh lo vang che. Hmeichhe hmelchhe deuh pawh hian chhass hmelchhe deuh an duh bik lo. Chuvang chuan inchhung lum atang be mai mai rawh. Mipa ka nia, ka chhe lo tawk alawm, ‘Thih leh thih, dam leh dam,’ tih rilru pua i hmu duh a nih chuan hei hi hre rawh.

Smart takin, inchei over suh. Sunday a nih loh emaw, khawi lai function-a i kal zo hlim a nih loh chuan Sunday dress lutuk kha hmeichhia khan an ngaitheilo leh pek ang. hmeichhe sual leh khirhzia leh bem tluk awlsamzia hi chuh!

Khawi lai bazar lun laiah mai mai hmu suh! A hmun hi a pawimawh a nia. In inhmuh hunah in awm zui zel dan tur sawi hmasa rawh. Restaurant tlema changkang pawla thutdunpui zawk kha a pawi lo. Chumi huna i pawisa phawrh theih tur chu i neih ngei a ngai. I nei lo a niha a hmeichhia zawkin thingpui in man a pe a nih chuan a duh hun hunah a then daih mai ang che.

Hmel leh hmel in inhmu ta a, in inhmuh atang a mizia a dang em, a biak dan che kha i hriat kar a ngai. In inhmuh zan atang tih tur a neih tam sawt chuan a duh lo che. Tin, i status pawh a rawn comment khât viau chuan a duh lo che. Nang a zûnah uai viau mah la, a duh miau loh che chuan kalsan mai rawh. I hmelchhe lutuk a, a duh lo che a alawm. A nih loh paw’n i chet zei loh em avangin a be peih tawh lo che a ni mai. Thian tha takah siam zawm tum a, chu pawh chu nangma tan chuan a harsa lam a ni thei.

Chutia hlim taka in la inbiak zawm zel theih chuan a va tha tak em! Inneih thute in sawi ta zel a nih chuan kei pawh min rawn sawm r’u. A chhan chu ka thuziak i chhiar vanga hetiang hun thleng thei hi a ni tlat a. Kei pawh chutiang hunah chuan ka kal châk a, ‘sa free’ awmna hi kan hre ve duh a ni tih i lo hre dawn nia. Thu tha tak ka ziah hi in fate pawh in lo hrilh chhawng zel dawn nia. A va tha tak em! Good Luck. (He post hi vawi 279 keu hawn a ni tawh e.)